Կարդալ, թե չկարդալ

Հայերը միշտ էլ սիրել են գիրք գնել: Շատերի բնակարաններում հավասար շարքերով դասավորված գրքերը ինտերիերի կարևոր ատրիբուտներից են: Այդ գրքերի մի մասը մարդիկ նաև կարդում էին: Կարդում էին, երազում նմանվել հերոսներին: Ռոմանտիկան առաջ էր, իսկ հիմա...

Իսկ հիմա չոր փաստեր: Հիմա գրքերը դիտարկվում են կիրառական տեսանկյունից: Վերցնենք  բիզնեսի վերաբերյալ գրքերի օրինակը. մենք սիրում ենք կարդալ, սովորել, զարգանալ և փորձել կիրառել այն գիտելիքները, որ ստացել ենք գրքից:


Եթե ուզում ենք զբաղվել մարքեթինգով, ապա հիշում ենք Կոտլերին (Philip Kotler): Եթե մեզ հետաքրքրում են մենեջմենթի հարցեր, ապա շտապում ենք ձեռք բերել Դրաքերի (Peter Drucker) գրքերից մեկը, իսկ անհատական կարողությունների զարգացման համար անմիջապես դիմում ենք Սթիվեն Կովիի (Steven Cow) օգնությանը:


Բիզնեսի վերաբերյալ գրքեր գնում են անհատները, ովքեր ցանկանում են սկսել իրենց բիզնեսը (իսկ ամեն հայ երազում է ունենալ իր սեփական բիզնեսը), հաջողակ և ձախողված գործարարները, թիմային խնդիրներով տառապող անձնակազմի պատասխանատուները և, իհարկե, ուսանողները:


Ուսանողների հարցը առանձին զրույցի առարկա է: Ուսանողները կարդում են այն, ինչ պարտադրվում է: Կարդում են ուզած, թե չուզած: Կարդում են քննություն տալու և հաջորդ կուրս տեղափոխվելու նպատակով: Իսկ միգուցե կարդալ նաև այն, ինչն օգտակար է, ժամանակակից է և կիրառելի:


Ցավոք սրտի, վերջին տարիներին նկատվել է բիզնես գրքերի վաճառքի անկում, որի հիմնական պատճառներից են հանդիսանում ինտերնետի արագընթաց զարգացումը և գիտելիքի նկատմամբ հետաքրքրության նվազումը:


Իսկ ի՞նչ լեզուներով են այդ գրքերը: Ռուսերեն, անգլերեն…միայն ոչ հայերեն: Բարեբախտաբար, վերջին տարիներին գրախանութներում հայտնվել է հայերեն լեզվով բիզնես գրականություն: Դրանք հիմնականում թարգմանություններ են, որոնք, ցավոք սրտի, հիմնականում անհաջող են: Կան նաև որոշ բրոշուրներ` գրված անհատական նախաձեռնությամբ: Սակայն, նախաձեռնությունն արդեն գովելի է: Մեզ պետք են հայերեն լեզվով, հայկական շուկային համապատասխան գրքեր` հայկական օրինակներով:


Գիրքը պետք է կարդալ, գրքից պետք է սովորել, գրքի տված գիտելիքը պետք է կիրառել: Այլապես գիրքը միայն կլինի մեր բնակարանի կամ գրասենյակի անկյունը գեղեցկացնող ատրիբուտ: Ոչ թե բովանդակության, այլ ձևի համար: Մենք սիրում ենք գիրք գնել...