August 15, 2012

ԴԱԺԱՆ ՓԱՍՏԵՐ ԵՎ ՀԵՇՏ ԼՈՒԾՈՒՄՆԵՐ. մաս 4

Այս տարի բերքն առատ է, ամենուրեք և բոլոր տեսակի մրգերի և բանջարեղենների: Սակայն բավականին լուրջ խնդիր կա` կապված խոտի հետ: Անձրևային ամառվա պատճառով խոտի քանակությունը բավականին քիչ է` համեմատած նախորդ տարվա հետ: Ու բնականաբար գները աճում են: Օրինակ Ամասիայի և Աշոցքի տարածաշրջանում (երեկ այնտեղ էի գործերով) այս տարի մեկ տուկ խոտն արդեն վաճառվում է 1500 դրամով, այն դեպքում, երբ անցյալ տարի գինը եղել է 500-600 դրամ:

Խոտի սակավությունը և թանկությունը բերում են անասնագլխաքանակի կտրուկ նվազման: Գյուղացիները սկսել են իրենց կովերը մորթել, քանի որ չեն կարողանում համապատասխան քանակի խոտ կուտակել: Որպես արդյունք թարմ մսի մեծածախ գինը նվազել է: Մի քանի շաբաթ առաջ առևտրականները գյուղացիներից միսը ձեռք էին բերում մոտ 1800 դրամով, իսկ հիմա այդ գինը նվազել է ընդհուպ մինչև 1200 դրամ: Բայց ինչպես սովորաբար լինում է Հայաստանում, մեծածախ գները նվազում են, իսկ մանրածախ գինը, որը վճարում են սպառողները, մնում է նույնը:

Ինձ թվում է` գյուղնախարարությունը պետք է միջամտի այս զարգացումներին: Պետք չէ սպասել ու հետո կանգնել փաստի առաջ: Հիմա արդեն պարզ է, թե ինչ զարգացումներ են լինելու: Պետք չէ ուղղակի ասել, թե մասնավոր հատված է, մենք չենք կարող միջամտել: Պետք է միջամտել ու անհապաղ: Գյուղատնտեսությունը այն ոլորտն է, որտեղ ոչ թե պետք է միայն դիտել ու գրանցել, այլ նաև ազդել: Չէ՞ որ թանկացումները ազդում են ողջ բնակչության վրա: Բացի այդ անասնագլխաքանակի նվազումը 1-2 տարվա ընթացքում չի վերականգնվում:  Իսկ սա երկրի սննդի անվտանգության խնդիր է: Ոչ ավել, ոչ պակաս` երկրի անվտանգության խնդիր…

Լուսանկարը` Նարեկ Հարությունյանի


1 comment :

  1. Ձեր գրառումը տեղ գտավ www.BlogNews.am կայքում: Շնորհակալություն:

    ReplyDelete