Ինչ է քոուչինգը, ով է բիզնես քոուչը

Քոուչինգը նպատակներին հասնելու և հաջողություն գրանցելու ստեղծագործ գործընթաց է, որտեղ քոուչը օժանդակում է մարդուն ճանաչելու իր սեփական ԵՍ-ը:

Քոուչը բացահայտում է.

• Մարդու նոր հնարավորությունները
•  Թաքնված պոտենցիալը և ռեսուրսները
•  Արդյունավետության բարձրացման ճանապարհները
• Առաջացած խնդիրների լուծումները

Քոուչը հաջողակ անձնավորություն է, ով տիրապետում է համակարգային գիտելիքներին և ունի մեծ փորձ` մարդուն իր նպատակներին առավել արդյունավետ ճանապարհներով հասնելու օգնության գործում:  Մարդու հնարավորություններն անսահմանափակ են և, երբ նա օգտագործում է իր բոլոր ռեսուրսները, ապա արդյունքները լինում են առավելագույն:

Ինչպես ասում են, լավը լավագույնի թշնամին է: Քոուչն աջակցում է անձին կանգ չառնել լավի վրա, այլ ձգտել լավագույնին:

Քոուչը ցույց է տալիս ճանապարհը, ուղղորդում է դեպի ճիշտ նպատակներ: Եթե քոուչն իսկապես պրոֆեսիոնալ է, ապա անձը ինքն է սահմանում իր նպատակները և մշակում այդ նպատակներին հասնելու ռազմավարությունը: Նրա հետ աշխատելիս մարդու մոտ ի հայտ է գալիս վստահություն, որը հետագայում օգնում է նրան առաջ գնալու:

Բիզնես քոուչի հիմնական խնդիրներից է ստիպել յուրաքանչյուրին հավատալ իր ուժերին, հասնել իր հնարավորությունների գագաթնակետին` դրանով իսկ նպաստելով ամբողջ կազմակերպության նոր որակական մակարդակի հասնելուն:

Ավելի գնահատելի է այն, որ բիզնեսում արդյունքների հասնելու և անընդհատ նոր գիտելիքներ ստանալու գործընթացը տեղի է ունենում աշխատանքային պրոցեսին զուգահեռ: Մշտապես սովորելու ունակությունն է, որ անձին և կազմակերպությանը դարձնում է անպարտելի` մրցակցությունից դուրս:

Ներկայումս քոուչի ծառայություններից օգտվում են երկու հիմնական խմբերի ներկայացուցիչներ: Առաջինը` բիզնեսի հիմնադիրներ և թոփ ղեկավարներ, որոնց դեպքում անհրաժեշտ են առանձնահատուկ մոտեցումներ: Որպես հիմնական դերակատարներ և առաջին դեմքեր` նրանք իրենց վրա են վերցնում բիզնեսի բոլոր ռիսկերը: Սա այն դեպքն է, երբ հաջողությունները բոլորինն են, իսկ ձախողումները միայն հիմնադիրներինը կամ թոփ մենեջերներինը: Ինչպես ֆուտբոլում են ասում, հաղթանակը թիմինն է, իսկ պարտությունը` մարզիչինը:

Երկրորդ խմբում կազմակերպությունների մենեջերներն են, ովքեր պատասխանատու են իրենց տրամադրված ռեսուրսների (մարդկային, ֆինանսական, տեղեկատվական և նյութական) առավելագույնս արդյունավետ օգտագործման համար:

Ինչպես գիտեք, ճապոնական մենեջմենթի համակարգում կարևորվում է գործընթացը, իսկ ամերիկյանում` արդյունքները: Քոուչն օգնում է անձին գտնելու ոսկե միջինը և հասնելու բոլոր նպատակներին` գործընթացը դարձնելով առավել արդյունավետ:

Սպորտում մարզիչը մարզիկին պատրաստում է մրցումներին մասնակցելու համար, իսկ քոուչը անձին աջակցում է բիզնեսի աշխարհում լինել առաջնորդ, դառնալ մրցունակ և ՄԻՇՏ մնալ առաջինը: