Կառավարչական թվային մարքեթինգ

Ի՞նչ է կառավարչական թվային մարքեթինգը:

Այն հնարավորություն է տալիս ընկերությունների սեփականատերերին, տնօրեններին և մենեջերներին որոշումներ կայացնել թվային մարքեթինգի ռազմավարության, գործիքների կիրառման արդյունավետության, մարքեթինգային թիմի արտադրողականության, բյուջեի և այլ կարևոր հարցերի շուրջ:

Առաջին հայացքից տպավորություն կարող է ստեղծվել,  թե թվային մարքեթինգով զբաղվելը այդքան էլ դժվար չէ: Սոցիալական ցանցերում պրոֆիլներ ու էջեր բացելը րոպեների հարց է: Ապրանքների կամ ծառայությունների վերաբերյալ նկարներ, հայտարարություններ, տեքստեր տեղադրելը լրիվ անվճար է: Կարելի է ոչ մեծ գումար ծախսել ֆեյսբուքյան գովազդի և որոշ քանակությամբ «չինական Like»-եր հավաքելու նպատակով: Ավելին, վեբկայք և էլեկտրոնային հասցեների ցանկ ունենալն էլ առանձնապես խնդիր չէ` թե´ գումարային, թե´ ժամանակային առումով:

Բայց արդյո՞ք այս ամենը արդյունավետ է աշխատում, արդյո՞ք նոր հաճախորդներ են ներգրավվում, արդյո՞ք ընկերության ճանաչելիությունը ավելանում է, արդյո՞ք մարքեթինգային թիմը հասնում է իր առջև դրված նպատակներին: Ու ամենակարևոր հարցը. միգուցե այս ոճով աշխատելը ոչ միայն օգուտ չի բերում, այլ` վնասում է ընկերությանը:

Այս բոլոր հարցերի պատասխանը տալիս է կառավարչական թվային մարքեթինգը:

Ի՞նչ է հարկավոր անել:

Առաջին հերթին դա հստակ մարքեթինգային ռազմավարության մշակումն է, բյուջետավորումը և անձնակազմի ձևավորումը: Շատերը համարում են, որ անձնակազմի ընտրությունը` մարդկային ռեսուրսների կառավարչի աշխատանքն է, բայց, եթե դուք որոշել եք զբաղվել մարքեթինգով, պետք է կարողանաք ձևավորել թվային մարքեթինգի թիմ` գնահատելով անձի համապատասխանությունը ընտրված բիզնես մոդելին, և ստեղծել արդյունավետ հաղորդակցում ղեկավարության և թիմի միջև: Կառավարչական թվային մարքեթինգի շնորհիվ հնարավոր է խուսափել ավելորդ ծախսերից և ժամանակի կորստից:

Դժվար է պատկերացնել մարքեթոլոգի աշխատանքը` առանց արդյունավետության չափման: Դուք պարտավոր եք դա անել գոնե ամենապարզ եղանակով: Նախ դուրս բերեք մարքեթինգային գործունեության հիմնական ցուցանիշները` CAC-ն (Customer Acquisition Cost) և LTV-ին (Life Time Value): CAC-ն դա մեկ հաճախորդ ներգրավելու մարքեթինգային ծախսն է: Այն ստանալու համար պետք է գումարել բոլոր մարքեթինգային ծախսերը (գովազդ, աշխատավարձ, տպագրություն և այլն) և բաժանել այդ ժամանակահատվածում ներգրավված նոր հաճախորդների թվին: Իսկ LTV-ն ցույց է տալիս, թե որքան հասույթ է գեներացնում մեկ հաճախորդը, քանի դեռ նա գնում է ձեր ապրանքները կամ օգտվում է ձեր ծառայություններից:

Ստուգելու համար ձեր ընկերության մարքեթինգային արդյունավետությունը CAC-ն բաժանեք LTV-ին և բազմապատկեք 100-ով: Եթե ստացված արդյունքը 30%-ից ցածր է, ապա ձեր մարքեթինգի արդյունավետությունը բավականին լավ է: Եթե այն 20%-ից էլ ցածր է, ապա դուք կարող եք ընկերությունը ներկայացնել լուրջ ներդրողների:

Ընկերության վեբ կայքի արդյունավետությունն ստուգելու համար էլ մարքեթոլոգները առաջարկում են հետևյալ մոդելը` վերցնում եք կոնկրետ ժամանակահատվածի հաճախորդների թիվը, բաժանում եք այն նույն ժամանակահատվածում վեբ կայքի այցելուների թվին, այնուհետև` բազմապատկում 100-ով: Եթե ստացված թիվը 3%-ից ավել է, ապա վեբ կայքի արդյունավետությունը կարող եք լավ գնահատել: Եթե այն ցածր է, ապա վեբ կայքի դիզայնը, տեքստը, հաղորդագրությունները փոխելու ժամանակն է: Իհարկե, խոսքը վերաբերվում է միայն օրգանական թրաֆիկին, քանի որ վճարելու դեպքում (օրինակ` PPC), արդյունքները կախված են ոչ միայն կայքից, այլև` գովազդից, թիրախավորումից և այլն:

Մարքեթինգային գործիքները, օրինակ` PPC-ն, SMM-ն, SEO-ն և այլն, գրեթե բոլորին ծանոթ են, սակայն քչերը գիտեն, որ մարքեթինգային տարբեր գործիքների ընտրությունը արդյունավետ է, երբ այն կիրառվում է մարքեթինգային արշավի ճիշտ և համապատասխան փուլում: Հակառակ պարագայում, գործիքի կիրառությունը ոչ միայն նվազեցնում է մարքեթինգային արշավի արդյունավետությունը  մինչև 95%, այլև` կարող է վնասել ընկերությանը` անկախ ծախսվող գումարներից:

Ինչպե՞ս խուսափել թանկ արժեցող սխալներից, մշակել ճիշտ ռազմավարություն` հաշվի առնելով բիզնեսի և ոլորտի առանձնահատկությունները, արագ դիրքավորվել շուկայում, կառավարել թվային մարքեթինգի ամբողջ գործընթացը, բարձրացնել կիրառվող գործիքների արդյունավետությունը: Այս և մի շարք այլ հարցերի շուրջ կխոսի թվային մարքեթինգի փորձառու մասնագետ Մայք Լազիևը` «Կառավարչականթվային մարքեթինգ» դասընթացի ընթացքում:

Մայքը 17 տարի աշխատել է Մեծ Բրիտանիայի, Գերմանիայի և այլ շուկաներում ու արդեն անցկացրել է 20-ից ավելի նմանատիպ դասընթացներ եվրոպական մի շարք երկրներում, որտեղ մասնակցիների մեծ մասը եղել են ձեռնարկությունների բարձրագույն ղեկավարության ներկայացուցիչներ:

Թվային մարքեթինգի դասընթացը նախատեսված է գործարարների, տնօրենների, բարձր ու միջին օղակի մենեջերների համար: Դասընթացի մասնակիցների քանակը սահմանափակ է: Գրանցումն իրականացվում է առցանց տարբերակով և միայն առաջին 12 մասնակիցները հնարավորություն կստանան մասնակցել այս բացառիկ դասընթացին:

Դասընթացը Հայաստանում իրականացնում է բացառապես «Բի Էս Սի» Բիզնեսի Աջակցման Կենտրոնը: