Ձեռնարկատեր լինելու մասին. 2-րդ մաս*

Կորպորատիվ մշակույթ

Դուք եք ձեր ընկերության կորպորատիվ մշակույթի պահապանը: Միայն դուք եք որոշում ինչն է ընդունելի, ինչն ոչ: Եթե ձեզ համար միևնույն է և դուք անտարբեր եբ, ապա դուք ոչնչացնում եք մշակույթը:

Միշտ ավելի հեշտ է աշխատանքի ընդունել համախոհների, քան փորձել համոզել նրանց, ովքեր չեն հավատում ձեր մշակույթին: Եթե դուք պատրաստվում եք վարձել լավ մասնագետի, ով չի կիսում ձեր արժեքները, ապա հաստատ չարժե:

Դուք ստիպված կլինեք խոսել, բղավել, հուշել, կրկնել, երգել, հիշեցնել ընկերության արժեքների մասին: Մշակույթը մշակույթ է դառնում միայն այն ժամանակ, երբ այն շարունակաբար գտնվում է եթերում:

Լավ կորպորատիվ մշակույթի որևէ սահմանում գոյություն չունի: Այն չպետք է լինի ուտոպիստական, բայց պետք է առաջացնի աշխատակիցների արձագանքը:

Ձեր մշակույթը պաշտամունք չէ: Պետք է պահպանել միայն ընդհանուր սկզբունքները, իսկ ձևն ու բնույթը արագ կզարգանան ընկերության աճի հետ մեկտեղ:

Իդեալական մշակույթը հիմնված է երկու սկզբունքների վրա. ուրիշների աշխատանքի նկատմամբ հարգանք և բաց հաղորդակցություն: 

Առաջնորդություն

Վաղ թե ուշ դուք կհասկանաք, որ ազդեցությունն ավելի մեծ է այն դեպքում, երբ դուք ոգեշնչում եք մարդկանց, այլ ոչ ինքնուրույն դուրս գալիս մարտի:

Առաջնորդ լինելու լավագույն միջոցը օրինակ ծառայելն է: Լավ առաջնորդը ասում է, ինչպես անել այս կամ այն բանը: Լավագույնը` ցույց է տալիս իր օրինակով:

Որպես առաջնորդ լավագույնը, որ կարող եք տալ ձեր թիմի անդամներին` ժամանակն է: Նրանցից շատերի մոտ կլինեն վատ ժամանակներ կամ նրանք կլինեն անօգնական: Երբ դա պատահի, նրանք պետք է իմանան, որ դուք իրենց կողքին եք:

Մարդիկ դիմելու են ձեզ խորհրդի համար: Նույնիսկ այն ոլորտներում, որտեղ նրանք ավելի մեծ փորձ ունեն: Պետք չէ նրանց փոխարեն որոշումներ կայացնել, պարզապես աջակցեք նրանց:

Ղեկավարը համարվում է լավ առաջնորդ, երբ աշխատակիցները չեն վախենում պատմել նրան վատ լուրը:

Քաղաքականությունը սկսվում է վերևից: Եթե դուք որևէ մեկին աջակցեք, մնացած բոլորը կհետևեն ձեր օրինակին: Եվ հակառակը:

Դուք իրավունք չունեք բղավել ձեր աշխատակիցների վրա: Ոչ մի դեպքում: Եթե գործերը վատ են և ձեր համբերությունը հատել է, դուք կարող եք նրանց հետ կոշտ լինել: Բայց ոչ մի դեպքում մի բղավեք. դա անհարգալից է:

Մարդկանց ոգեշնչում է պետք: Որպեսզի լինեք առաջնորդ, դուք պետք է ոգեշնչեք թիմը, և ամենալավ տարբերակն անել դա պատմությունների միջոցով:

Պարբերաբար խոսեք թիմի հետ: Հաճախականությունն ու ֆորմատը կախված է ձեզանից: Դա կարող է լինել կես ժամ, շաբաթը մեկ անգամ կամ ամսվա մեջ երեք ժամ: Ես անցկացնում եմ նման հանդիպումներ ամեն ամիս արդեն երեք տարի շարունակ, և հաճախելիությունը 80%-ից երբեք չի իջել:

Շատ աշխատակիցներ կքննադատեն ձեր որոշումները, առավել ևս եթե դուք «աղմկոտ» առաջնորդ եք: Առանց հուսալի հետադարձ արձագանքի անսպասելի հարված ստանալը շատ հավանական է: Այդ իսկ պատճառով, կամ շրջապատեք ձեզ հավատարիմ աշխատակիցներով, որոնք չեն ամաչի ասել ձեզ դաժան ճշմարտությունը, կամ ստեղծեք բաց մշակույթ, որտեղ մարդիկ չեն վախենա ձեզանից:      

Ինքնակազմակերպում

Առաջին բանը, որ պետք է սովորեք, թե ինչպես կառավարել սեփական ժամանակը: Դա այն սուրբ ռեսուրսն է, որը պետք է պահպանել: Ասեք «ոչ» այն ամենին, ինչը արժեք չի ավելացնում:

Սովորեք կառավարել եկող նամակների հոսքը: Անկախ նրանից, կապի ինչ գործիքներ է օգտագործում ձեր ընկերությունը, դուք չեք փախչի էլեկտրոնային փոստից: 

Պլանավորեք: Ամեն կիրակի հատկացրեք կես ժամ հաջորդ շաբաթվա ծրագրերի վերլուծությանը:

Բաց մի թողեք ֆինանսական հարցերի զարկերակը: Յուրաքանչյուր ամսվա սկզբում դուք պետք է իմանաք ընկերության ծախսերի և եկամուտների մասին, թե որքան է ծախսվել աշխատավարձերի վրա և որքան է ընթացիկ հաշվի մնացորդը: Սահմանեք ամենօրյա կարգ այդ ինֆորմացիայի հավաքագրման համար:

Ցանկացած նոր տեղեկություն միանգամից կհայտնվի ձեզ մոտ: Շատ շուտով դրա ծավալը ձեզ ցնցող կթվա, ուստի սովորեք կառավարել այն:

ՄՌ և աշխատակիցների կառավարում

Ավելի լավ է ՄՌ մասնագետ վարձել ինչքան հնարավոր է շուտ: Ամենահարմար թիվը` 30 աշխատակիցն է:

Ինչքան շուտ դուք ներդնեք արդյունավետությունը չափող համակարգ, այնքան ավելի լավ: Երբ ընկերությունը երիտասարդ է, դուք գիտեք, ինչով են զբաղվում բոլորը: Բայց աճի հետ համատեղ, ամեն ինչին հետևելը ավելի է դժվարանում:

Տետ-ա-տետ հանդիպումները չափազանց կարևոր են: Խորհուրդ կտամ ամեն ամիս անցկացնել նման հանդիպումներ յուրաքանչյուր աշխատակցի հետ:

Սահմանեք նպատակներ: Ավելի արդյունավետ լինելու համար յուրաքանչյուր աշխատակցին հարկավոր են նպատակներ: Մարդիկ բավականաչափ չեն աշխատում, ոչ այն պատճառով, որ չեն ցանկանում, այլ այն պատճառով, որ չունեն ուղղություն: Եռամսյակը լավագույն տարբերակն է, նպատակներ սահմանելու համար:

Հետադարձ կապ: Քննադատեք և գովեք հավասարաչափ: Պատրաստված լինելը կարևոր է: Թող որ ձեր քննադատությունը հիմնված չլինի էմոցիաների վրա, այլ փաստերի: Չարժե սկզբում գովել հետո քննադատել, հետո նորից գովել: Եղեք հետևողական:

Պարզապես քննադատելը քիչ է: Ձեր պարտքն է մարդկանց խորհուրդ տալ, ինչպես կարող են նրանք ավելի լավը դառնալ: Եթե դուք ուղղակի քննադատում եք, փոխարենը ոչինչ չառաջարկելով, դուք պարզապես ծախսում եք ձեր աշխատակիցների ժամանակը:

Գնահատում: Յուրաքանչյուրը ժամանակ առ ժամանակ ձեռք բերումների և արժանիքների գնահատման կարիքն ունի: Եթե մարդը ինչ որ լավ բան է արել, սրտանց գովեք նրան, մի հետաձգեք:

Մարդիկ չեն հեռանում ցածր աշխատավարձի պատճառով: Նրանք հեռանում են անարդարության պատճառով: Դուք պարտավոր չեք մրցել այլ գործատուների հետ, ովքեր ավելի մեծ դրամապանակներ ունեն: Արեք այն, ինչ կարող եք, բայց մարդիկ պետք է իմանան, որ դուք արդար եք:

Ձևավորեք գործընթաց, որի միջոցով սկսնակները կծանոթանան ընկերության գործունեության հետ: Երբ ձեր բիզնեսը փոքր է, նոր աշխատակիցները հեշտությամբ կարող են հասկանալ, ինչ է տեղի ունենում իրենց շուրջը: Բայց երբ թիմում 30-ից ավելի աշխատակից է, ապա այդ գործընթացը կարող է երկար տևել: Դրա համար մտածեք, ինչպես կարելի է այն պարզեցնել:

Հաստատեք հաշվետվությունների կոշտ գործընթաց: Եթե դուք ունեք ընկերության մասին առավել շատ տեղեկատվության աղբյուր, դա ձեր ամենամեծ ակտիվն է: Ընկերության աճի հետ համատեղ դուք կհասկանաք, որ ավելի ու ավելի դժվար է ստանալ ողջ տեղեկատվությունը: Դուք պետք է ներդնեք տեղեկատվության փոխանցման հստակ և թափանցիկ մեխանիզմ` ձեր աշխատակիցներից դեպի ձեզ և հակառակը:

Յուրաքանչյուր բաժնի ղեկավար պետք է ձեզ տեղյակ պահի ընթացիկ գործերի մասին ոչ ուշ, քան երկու շաբաթը մեկ անգամ: 

Շարունակելի...      

* Google-ի նախկին աշխատակից և Hacker Earth ծառայության հիմնադիր Սաչին Գուպտայի մտքերը ձեռնարկատիրության մասին: Նա սկսնակ ձեռներեցներին տալիս է տարբեր խորհուրդներ, թե ինչպես կայացնել որոշումներ, լինել առաջնորդ, ներգրավել ներդրումներ և անցկացնել խորհրդակցություններ…